Poezi nga Mehmet Bislimi

Gurëzim

Këngë
në një kohe tjetër
kur korbat trazuan idilet
me krrokatën e tyre të vjetër
kur moti u hallakat në Debëlldej
mbi kodrën e lartë
gurët e dhembjes i ngulen
në tokën tonë
në gjoksin e thatë
rihapen plagë të reja
plagë që kullojnë gjak
në tokat tona
melodinë e fyellit
bariut ia përdhunuan
si në legjendë
në kohën tonë në Debëlldej
qeleshet u gurëzuan
gurët mbi gurë tokën rëndojnë
Kosovë e lashtë
gjymtyrët po t’i amputojnë
kaq shpejt plagët harruam
flini
flini gjumë


Kryqëzimi

kryeneçësinë e varën publikisht
që të bashkëjetojmë me frikën
të bashkëjetojmë miqësisht
ta bartim peshën
dhe metaforën e kryqit mbi shpinë
së bashku me hilen
e besimit të rremë në Perëndinë
së bashku me ata që nuk e duan
të bërë
të bashkuar
Shqipërinë


Shtator, 2002
Mehmet Bislimi