Sipas të gjitha gjasave reformimi i LDK nuk do të ndodhë, përkundrazi siç po shihet vetëm do të sforcohen grupet e interesit të cilat gjithçka që ka emrin LDK e Kosovë e kanë vënë në shërbim të tyre.

Jo vetëm LDK-ja si një parti politike por edhe simotrat e saj si dhe të gjitha organizatat joqeveritare e institucione të tjera duhet të jenë në shërbim të zhvillimit demokratik të Kosovës jo të klaneve të interesit brenda atij organizimi. Kjo nuk po ndodhë dhe proceset e zhvillimit të Kosovës po zvarriten dhe do të zvarriten edhe më tej.

Ishte një shpresë, ishte një ndjenjë se ndoshta brenda LDK-së, pas gjithë këtyre disfatave do të ndodhë mrekullia?!... Por Kosovës mrekullitë nuk po i pikojnë nga qielli kurse njerëzit e saj, veçmas këta në LDK sikur janë duke ecur nëpër qiell. Sille kah ta sillesh gjendja në këtë parti është si “mozomakeq”.

Ditë më parë e kam theksuar gabimin që lëshoi KP i LDK-së i cili autorizoi pikërisht bartësit e fatkeqësisë, fajtorët e pashmangshëm, profiterët e interesit dhe njerëzit përgjegjës për disfatën e pandalshme të kësaj partie që ka pësuar sidomos pas vdekjes së kryetarit të saj dr. Ibrahim Rugova, atëherë kur këto klane dolën në sipërfaqe dhe përçanë partinë duke e bërë elektoratin e saj pikë e pesë.

Në vend që të caktoheshin bartësit e komisioneve nga KP i LDK-së apo të gjendeshin ekspert në terren, kryesuesit e komisioneve u rizgjodhën pikërisht ata që janë përgjegjës për situatën e krijuar në këtë parti.

Grupi i parë për “Platformën politike të zgjedhjeve” do të udhëhiqet  nga Eqrem Kryeziu, bartësi kryesor i të gjitha dështimeve brenda kësaj partie. Platforma e tij do të zgjerohet në përçarje dhe poshtërime të mëtutjeshme. Shkatërrimi që Eqrem Kryeziu ia ka bërë Degës së LDK-së në Prizren dhe LDK-së në përgjithësi i ka plotësuar të gjitha kushtet për një pension jetësor dhe largimin e tij nga të gjitha funksionet bartëse, qofshin këto partiake apo shtetërore. Por jo, kryesia e LDK-së dhe vet Eqremi do t’i shkojnë deri në fund misionit të tyre në shkatërrimin përfundimtar të LDK-së.

Në grupin e dytë për “Plotësim ndryshime të statutit të LDK-së” është vendosur t’i bëjë Nekibe Kelmendi, e cila ndoshta vetëm si femër mund të plotësoj një kriter përfaqësimi, përndryshe do të ishte në nderin e saj që kësaj radhe të mos përzihej. Në shkrimin tim (për çështje etike) po përmbahem, jo pse s’ka çfarë të thuhet për te, por thjesht për dhembjen dhe tragjedinë që i ka ndodhur në familje. Megjithatë Nekibja me vetëdije po bëhet pjesë e proceseve dështuese dhe me vetëdijen e saj po merr pjesë në shkatërrimin përfundimtar të LDK-së.

Grupin e tretë për “Programin politik dhe zhvillim të LDK-së” do ta udhëheq Sabri Hamiti, tashmë edhe këtij i ka dal boja nga funksionet e shumta dhe nga papërgjegjësia politike që ka në të gjitha zhvillimet politike që po shkon Kosova dhe LDK-ja, të cilës klani i Hamitëve iu ka bërë gangrenë me shenja kanceroze. Unë kam pasur konsideratë për këtë Njeri, si poet dhe kritik letrar, si një intelektual i madh, por familjarizmi i tij kudo e kahëdo le për të dyshuar, pasi po duket se pos familjarëve të tij LDK-ja e as Kosova nuk kanë asnjë kuadër që i qon proceset më tej. Ndoshta si epror a mentor për titullin “dr” te nënkryetari Kryeziu, e ka bërë Sabriun si një karikaturë për të gjitha angazhimet e tija. Ndonëse edhe për Sabri Hamitin kam pasur një mendim jashtëzakonisht të mirë, nuk po mundem t’ia numëroj të gjitha pengesat dhe stagnimet që ky njeri për shkak të karizmës së tij të gabuar ia ka bërë LDK-së dhe Kosovës në përgjithësi, por një gjë është e vërtetë se revani i tij nuk ka të ndalur dhe pasojat do të jenë edhe më të mëdha pasi Sabriu është i njohur për bërryla e klane të interesit.

Fatkeqësia e të gjitha fatkeqësive për LDK-në është Isa Mustafa i cili do të udhëheq “Projektin politik të LDK-së për qeverisje”. Për pasojat që Isa Mustafa ia ka bërë LDK-së dhe Kosovës kam folë në një shkrim të më hershëm, prandaj nuk po i ripërsëriti gjërat të cilat i di vet Isa Mustafa dhe kushdo që i ka dy kokrra mend në LDK.

I gjithë ky proces reformimi është një “Show” i cili ngjason me procesin e masturbimit, përkatësisht kënaqësisë duke i mëshuar me dorë, dhe pikërisht këta njerëz jo që po i mëshojnë me dorë organeve të tyre eksterne, por janë duke ia qitur pelikorin e zi LDK-së.

Nuk ka gjë më të dhembshme për proceset e brendshme të një partie se sa t’i vendosësh udhëheqës për reforma partiake përgjegjësit kryesor të gjendjes në të cilën ka rënë PARTIA. Ky klan që u vet identifikua po shkërdhen demokracinë e brishtë kosovare, kurse anëtarësinë e vet po e mashtron me povratnikat që po kthehen si fitimtar a çlirimtar në “shtëpinë e vjetër?!”, që nuk ka të bëjë me demokracinë, përveç  të procesit që e theksuam më parë, pasi me ndonjë përjashtim pothuajse janë kuadro që nuk do të arrijnë t’ia ngritin imazhin LDK-së.

Njerëzit që kanë shkuar nga LDK-ja po dëshmohet se kanë ikur e po kthehen në parti për interesa personale dhe jo për programe politike, për koncepte veprimi a për shkolla udhëheqëse që mund të ketë kjo apo ajo parti. Partitë në Kosovë nuk kanë programe të dallueshme ashtu sikurse nuk i kanë as interesat e pasurimit dhe të korruptimit. Këtë gjë e shpjegon më së mirë qeverisja e keqe që i ndodhi vendit nga koalicioni PDK-LDK që ka sjell Kosovën e 11800 km2 në një gjendje të mjerë.

Si do qoftë fillimet e reformave në LDK do të duhej të niseshin ndryshe, sepse dita e mirë shihet në mëngjes.  Këto reforma do të duhej të udhëhiqeshin nga njerëz të rinj të cilëve nuk iu mungojnë dijet dhe aftësitë, si dhe në anën tjetër nuk bartin mëkatet e përgjegjësisë për gjendjen e krijuar në LDK.

Por, si duket edhe brenda LDK-së po ndikojnë interesat e klaneve të caktuara të cilat dita më ditë po sforcohen dhe identifikohen edhe brenda kësaj partie, por për të bërë reforma nuk pritet edhe për një kohe të gjatë, prandaj duhet duruar e pritur për një kohë tjetër që ndoshta do të sjell një udhëheqje reformatore e patriotike.

Zvicër,  20 qershor 2010.

*Botuar në gazetën „Epoka e Re“,  Prishtinë.