Fjala e z. Haki Latifi, kryetar i Degës së LDK-së në Zvicër 

APEL PËR DEBAT TË BRENDSHËM

Mund të zëvendësohet kryetari i LDK-së, edhe Presidenti i Kosovës mund të zëvendësohet, dhe kjo ka pak rëndësi, sepse emrat kanë pak rëndësi. Por, simboli Ibrahim Rugova nuk mund të zëvendësohet dot, nga askush. Ky nuk është fatalizëm, por realizëm. Popuj të ndryshëm kanë shumë kryetarë partish apo qeveritarë, por simbole kanë fare pak. Fati e solli që Rugova të ishte më shumë se qeveritar. Dhe ai e pranoi fatin siç i erdhi.     

I nderuari z. Shefqet Dibrani

I nderuari  kryetar i nëndegës së LDK-së  z. Sallah Januzi        

Të nderuar  Zonja dhe zotërinj,

Më lejoni që në emër të kryesisë së LDK-së Dega në Zvicër dhe anëtarësisë së saj, t`ju  përshëndes dhe të ju uroj për promovimin e librit "11 MINUTA PARA ORËS '00 ose mirazhi i suksesit të LDK-së ", të autorit Shefqet Dibrani.        

Gjithashtu më lejoni të përshëndes edhe iniciativën e nëndegës së LDK-së në St. Gallen dhe kryetarin e saj z. Sallah Januzi  për të promovuar këtë  libër në mesin             e mërgimtarëve këtu në Zvicër.

Gjithashtu përshëndes autorin për këtë libër që sjell sot për lexuesit. Zotëri Shefqet Dibrani  është njohës i mirë i Veprimtarisë së LDK-së ku gjatë veprimtarisë së tij ka qen bartës i disa funksioneve në LDK siç janë: Anëtarë i kryesisë së Degës së LDK-së në Zvicër, dy herë delegatë i kësaj Dege në Kuvendet e LDK-së në Prishtinë (1994; 1998), anëtarë i Këshillit Qendror të LDK-së për Zvicër, kryetar i parë nëndegës së LDK-së në St. Gallen, Koordinator i Grupit të 10-të, të nëndegëve të LDK-së etj.

Po ashtu më duhet të theksojë se kam pasur nderin të jem bashkëveprimtar  me te në ditët më të vështira që kalonte Kosova, ku jemi munduar të japim, dhe vazhdojmë të japim kontributin për çështjen kombëtare, bashkë me qindra e mijëra veprimtarë të tjerë të kauzës kombëtare, që vepronin kryesisht në kuadër të Degës së LDK-së në Zvicër. Njëherit të gjithë jemi dëshmitarë të asaj se çfarë pune kolosale, ka bërë kjo degë, në të mirë të Kosovës, e çështjes kombëtare në përgjithësi.

Aktiviteti i kësaj dege përmbledhur në një hark kohor 21-vjeçar, ka një meritë të vetën, me një begraund të lartë kombëtar. Në të cilën, ne edhe veprimtarët  brenda saj kanë investuar shumë.                                                

Veprimtaria politike dhe letrare e autorit z. Shefqet Dibrani, është  në interes të kulturës dhe çështjes së Kosovës, që është sa produktive aq dhe definuese për shumë procese e madje edhe për pavarësinë e Kosovës. Ky libër (sado me kritika të ashpra), ma merr mendja se ka për qëllim hapjen e debatit të brendshëm, mjaftë i domosdoshëm për të tashmen e LDK-së, dhe përshkruan me hollësi, jo vetëm thjesht si sentimentalizëm, por me një ndjenjë përgjegjësie që edhe sot e kësaj dite po e e jep vet autori me shkrimet e tija analitike që kanë për temë  zhvillimet  brenda LDK-së si dhe dëshira për ta parë LDK-në si prijëse në të gjitha proceset  politike, zhvillimore në Kosovë dhe më gjerë. Gjatë gjithë kësaj kohe ky autor nuk ka reshtur, tashti publicistika kosovare pasurohet edhe me një libër nga një autor që jeton përtej „kufijve“, pra, nga këtu në Zvicër. Librave të shumtë, i shtohet edhe një rrjedhë tjetër që ngjason sikurse ujërat që mblidhen në lumin e madh, të cilit i shtohet edhe një përrua dhe kjo e bën më të begat këtë lum, sepse çdo lum i madh krijohet e pasurohet nga burimet, siç thotë proverbi francez i njohur edhe tek ne se “pika - pika bëhet lumi”.                      

Secili prej nesh mund të ketë mendime të ndryshme për çështje të caktuara. Mendoj edhe autori në fjalë. Ndonjëherë, edhe brenda një familjeje për çështje të caktuara ka mendime të ndryshme, dhe kjo është krejtësisht e natyrshme dhe e shëndetshme. Mendoj se vetëm me një dialog të kundërshtive lind progresi, kurse shoqëria njerëzore ec përpara në zbulimin e virtyteve njerëzore brenda vetvetes.

LDK si forcë politike, në thelbin e saj anti-dogmatike, duhet ta inkurajojë debatin brenda vetes, në mënyrë që nëpërmjet atij debati të lindin mendime dhe ura të bashkimit. Disa do të thoshin se kjo është e vetmja mënyrë, por edhe kjo është çështje e debatit.                                                                                          

Autori i librit z. Shefqet Dibrani ashtu edhe siç shprehet vetë në këtë libër se "libri paraqet një kurs politik, një koncept të pandryshuar, që kam ndjekur që nga dita e anëtarësimit në LDK. Ndërsa kritikat përkitazi me zhvillimet e brendshme politike kanë qenë të vazhdueshme, duke ruajtur një vizion të qartë që nga fillimi e gjer më sot. Pasaktësitë a lëndimet e mundshme kanë të bëjnë më shumë me çastin dhe rastin kur janë shkruar, me mllefin që ka ekzistuar në ato çaste, por jo si një platformë e drejtuar ndaj individit, kushdo që të jetë ai, ndaj shoqërisë sonë që po prosperon drejt së ardhmes së saj demokratike, e ruana Zot të më shoqërojë ndonjë vrer kundër LDK-së në veçanti, dhe Kosovës në përgjithësi“.

Me fjalë të tjera autori Shefqet Dibrani, shprehet se libri është sajuar si arsyetim mbi fakte, të cilën e jep me një profesionalizëm që nuk e kemi hasur në librat e kësaj natyre, që e bashkon me sinqeritet e dashuri për njerëzit e vyeshëm në LDK, si vlerë tjetër e madhe e këtij libri.            Fundja e fundit autori ngulmon pa reshtur që anëtarëve dhe simpatizuesve të devotshëm të LDK-së, pra "Rugovistëve", duhet t'u jepet hapësirë... Atyre duhej hapur dyert e dritaret, atyre duhej dhënë shansi demokratik, duke kanalizuar me kujdes energjitë, kreativitetin e përkushtimin për forcimin e LDK-së, duke vijëzuar procesin e ndërtimit e bashkëkrijimit të strukturave të fuqishme partiake, të përbashkuara rreth frymës Rugoviane. Mendoj, se ky është qëllimi i vetëm i këtij autori, edhe nëse nuk ka arritur ta shpreh si duhet, shpresoj angazhimi i tij 20-vjeçar e dëshmon më mirë qëllimin e tij të mirë.

Mund të zëvendësohet kryetari i LDK-së, edhe Presidenti i Kosovës mund të zëvendësohet, dhe kjo ka pak rëndësi, sepse emrat kanë pak rëndësi. Por, simboli Ibrahim Rugova nuk mund të zëvendësohet dot, nga askush. Ky nuk është fatalizëm, por realizëm. Popuj të ndryshëm kanë shumë kryetarë partish apo qeveritarë, por simbole kanë fare pak. Fati e solli që Rugova të ishte më shumë se qeveritar. Dhe ai e pranoi fatin siç i erdhi.                           

LDK-ja  ka nevojë si kurrë për lirinë e mendimit, për shumësi mendimesh, për platforma të shumëllojshme politike, për pluralizmin politik, por asnjë nga ato nuk guxojnë të bien ndesh me "Programin Kombëtar" të filozofisë politike të dr. Ibrahim Rugovës dhe LDK-së, program ky i përgjakur me gjakun e ideatorëve të tij si: Fehmi Agani, Adem Jashari, Latif Berisha, Gazmend Zajmi, Xhemail Mustafa, Bajram Kelmendi, Ismet Rraci, Haki Ymeri, Sali Çeku, Ukë Bytyçi, Smajl  Hajdaraj, e shumë të tjerë që ishin veprimtar e bërthama e LDK-së dhe e lirisë së Kosovës.

Dhe krejt në fund, autorit z. Shefqet  Dibrani, bashkëveprimtarit tonë, i uroj shëndet të mirë dhe suksese në veprimtarin e tij krijuese e letrare. Natyrisht nga nëndega e LDK-së në St. Gallen pres aktivitet e gjallërim kulturor e politik, sepse ndikimi i kryesisë suaj ka bërë që Grupin i 10-të i nëndegëve të LDK-së, për vitet të tëra të mos e ketë atë namin që e ka pasur dikur.

St. Gallen, 18 dhjetor 2011

Haki Latifi,

kryetar i Degës së LDK-së në Zvicër

Fjala e z. Sallah Januzi, kryetar i Nëndegës së LDK-së në St. Gallen të Zvicrës

Përshëndetja:

Të nderuar zonja dhe zotërinj,

miq të dashur, aktivist dhe personalitete të jetës publike!

Shkas për tubimin tonë është miku ynë, veprimtari shumëvjeçar, poeti dhe shkrimtari Shefqet Dibrani të cilin e përshëndes ngrohtësisht, bashkë me familjen e tij.

Natyrisht nuk do të mungojë një përshëndetje e ngrohtë për të gjithë ju që keni ardhur në këtë tubim tonin për ta nderuar bashkërisht  një krijues, po më shumë për ta nderuar me diskutimet tuaja veprën e një autori, që tashmë po dëshmohet se është mjaftë i suksesshëm!

Ndoshta dikush do të pyeste pse ky tubim në emër të Nëndegës së LDK-së, pas kaq e kaq vitesh heshtjeje. Nuk dua t'i elaborojë në këtë aktivitet kulturor, por pa dyshim ishte sakrifica dhe guximi i Shefqet Dibranit, jo për të kritikuar, por për të hapur debat brenda LDK-së që më shtyri të solidarizohem me konceptet dhe pikëpamjet e tija. Me një Njeri, i cili qoftë si aktivist, por më shumë si krijues është dëshmuar i fort dhe i qëndrueshëm, dhe kjo ishte gjëja më e pakt që në këto momente mundja të bëja për te, sepse kam vërejtur: Ne si komb gjithçka mund t'i pranojmë njëri tjetrit por suksesin nuk mund t'ia pranojmë askujt.

Le të mbetet ky gjest i Nëndegës së LDK-së në St. Gallen një simbolik e të kundërtës, sepse edhe ashtu të gjitha arritjet e Shefqet Dibranit rrënjët i kanë në këtë qytet, bashkë me të gjitha nismat e tij edhe në fushën letrare.

***

VËSHTRIM:

NE DUHET TË MËSOHEMI ME KRITIKËN E MIRËFILLTË DHE AJO DUHET TË RESPEKTOHET!...

(Shefqet DIBRANI: „11 MINUTA PARA ORËS '00 ose mirazhi i suksesit të LDK-së“, Prishtinë 2011).

Të flasësh në mënyrë profesionale si kritik, (pasi unë nuk jam i kësaj fushe), kam hezitim, por e di se të flasësh për librin e një autori, në këtë rast të Shefqet Dibranit duhesh ta njohësh mirë aktivitetin, jetën, peripecitë dhe rrugën nëpër të cilën kaloi dhe veproi ai deri sa u bë autor i njohur. Në këtë pikë ndjehem më i sigurt, pasi i ka mbi 20 vite që kemi punuar bashkërisht, prandaj po i jap vetës të drejt që të flas edhe si kritik i veprës por edhe i jetës së autorit!

Rrugë kjo përplot pengesa, madje jeta e tij u përcoll edhe me kërcënime e likuidime fizike, jo për gjë tjetër, vetëm pse Sh. D. gjithmonë e ka thënë të vërteten, drejt,  troç mu ashtu siç edhe ishin. Kjo vepër, sjell përshkrimin e tij jetësor, si një pjesë e aktivitetit të tij, që kanë dalë si një lloj proteste për anomalitë e shumta që nga viti 1990, kur edhe u themelua Nëndega e LDK-së e gjer më sivjet kur u botua ky libër. Me këtë vepër autori u tregua si Njeriu që më së miri i ka mbrojtur pikëpamjet politike dhe kombëtare që udhëhiqeshin nga Presidenti Historik i Kosovës Dr. Ibrahim Rugova. Vullneti i mirë dhe misioni i tij fisnik përmes LDK-së i shërbeu Kosovës.

Këtë gjë më mirë se kushdo tjetër e ka konkretizuar Shefqet Dibrani, qoftë përmes angazhimit të tij në politikë, e qoftë me analizat brilante të cilat me kalimin e kohës u dëshmuan mjaftë të sakta. Autori e  ka ruajtur një koncept dhe vizion të qartë që nga dita e anëtarësimit në LDK e deri më sot, por kritika  e tij për zhvillimet e brendshme politike, kanë qenë tipar i vazhdueshëm, dhe me sa e kuptoj unë, gjithmonë me qëllimin më të mirë për ta përparuar LDK-në dhe për ta quar çështjen kombëtare përpara.

Aktiviteti politik i Sh. Dibranit nis dhe zhvillohet përmes shkrimeve e komenteve mjaftë realiste. Ato bazohen në ngjarjet e përditshme, qofshin ato në vendlindjen e tij a në trojet shqiptare, po më shumë në diasporën shqiptare. Pra, libri “11 MINUTA PARA ORËS '00 ose mirazhi i suksesit të LDK-së”,  është një përmbledhje kronologjike e parashikimeve të tij rreth zhvillimeve politike që ndodhnin  në vendlindje, si dhe parashikimet dhe pasojat që do të lënë vragë në të ardhmen e Kosovës.

Interesant, libri fillon me një letër-korrespondencë në mes mërgimtarit Shefqet D. dhe këshilltarit politik I. Berisha, që ky i fundit, ishte te presidenti i Republikës së Kosovë  Fatmir Sejdiu. Autori e përshkruan në mënyrë shumë të qartë se si injorohet ai – qytetari nga ana e këtij këshilltari, kurse kryetari i shtetit hesht duke mos e përfillur interesin e qytetarit – popullit si dhe ligjet kushtetuese. Në këtë rast, poeti e përshkruan injorancën dhe poshtërimet e këtyre njerëzve që i bënin LDK-së dhe dr. Ibrahim Rugovës, ku një pjesë e këtyre njerëzve siç thotë vet autori, mrizonin nën hijen e kryesisë së LDK-së.

Siç thamë: Libri është sajuar nga shkrimet, reagimet, analizat dhe komentet gjatë  zhvillimeve politike që kanë ndodhur në LDK, si një apel për reforma në LDK. Veçmas duhet përmendur shkrimi “A do ta kapërcej LDK-ja Ylberin”, botuar në gazetën "Bota sot", të datës 16 maj 2000, ku autori i librit në këtë shkrim jo që paraqet pikëpamjet e tij për zhvillimet politike që ndodhnin në LDK, por qysh atëherë ai ka prezantuar publikisht një platformë politike për reforma, reforma që nuk u bënë kurrë, por që i kushtuan shumë LDK-së dhe Kosovës s'ka dyshim. Analiza  në fjalë  është aktuale  edhe sot për kryesinë e LDK-së.

Autori në këtë libër i ka paraqitur në mënyrë realiste zhvillimet dhe ngjarjet  që ndodhën në kryesin e LDK-së, që nga fillimi i saj e deri më sot. Në mënyrë shumë të mirë i përshkruan qëllimet e garniturës dhe grupeve marksiste-leniniste që ishin futur në kryesinë e LDK-së, për ta marrë siç thuhej  "Kalanë nga brenda", po më shumë për ta penguar e shantazhuar veprimin demokratik të LDK-së, ato grupe duke e penguar LDK-në, e dëmtonin rëndë çështjen kombëtare.

Me këto sjellje kryesia e LDK-së u gjet e papërgatitur për të përballuar luftën e armatosur. Autori i përshkruan mirë veprimet e shëmtuara të këtyre grupeve  që ishin stacionuar në vilat luksoze të socialistëve në Tiranë, pastaj ai kritikon edhe veprimin poshtërues të strukturave komanduese në Qeverinë e Kosovës në ekzil  të cilës i printe Bujar Bukoshi, i cili i shantazhonte veprimet e mira të LDK-së, në rrethanat më të ashpërsuara që kalonte Kosova. Kurse mjerimin e kësaj garniture e praqet në mënyrë të saktë dhe kronologjike, gjë që shihet se ka mbajtur shënime dhe ka ruajtur dokumente.

Siç thamë, autori  i përshkruan në hollësi veprimet poshtëruese të qeverisë së Kosovës në egzil në krye me Bujar Bukoshin të cilët i sabotonin veprimet e mira të Kryesisë Qendrore të LDK-së, Institucionin e Presidencës, Qendrën për Informim të Kosovës, pra QIK-un, të cilën e udhëhoqi deri sa e vranë Enver Maloku. Pastaj ai, përmes këtij libri na i rikujton edhe rastin e shkarkimit të z. Nazmi Peci nga Komisionin i 3 % në Zvicër, shkarkimet tjera mafioze dhe misterioze në përfaqësinë e zyrës së Kosovës në Tiranë: të Dr. Ali Aliut, Anton Kolës, pastaj shkarkimin e Mr. Nikë Gjeloshit dhe Ramush Tahirit nga postet më të larta në Qeveri, acarimin e raporteve me Hafiz Gagicën –Kryetar i Degës së LDK-së në Gjermani etj. etj.

Të gjitha këto veprime Bukoshi i ka bërë në koordinim me të majtën e Kosovës dhe Partinë Socialistet të Shqipërisë, në dëm të interesave kombëtare e veçmas në dëm të LDK-së.

Në shkrimin analitik "Kush do ta trondit skenën politike në Kosovë" autori e përshkuan hollësisht se si klani komunist e kishte pushtuar kalanë e LDK-së dhe e kishte arritur maksimumin e qëllimit të tyre duke e paralizuar gjithë veprimtarin politike të LDK-së, në një kohë shumë të vështirë  për Kosovën sepse mu atëherë duhej të ishte unik faktori politik në qëndrimet diplomatike dhe ushtarake.

Për LDK-në, siç thotë autori,  gangrenë e shndërruar në sëmundje kancerogjene që po i ngulfatin veprimet demokratike, "janë funksionet e dyfishta dhe postet e pesëfishta" të cilat i mbajnë një klan i ngushtë në kreun e LDK-së, dhe që duhet të bartin përgjegjësi për të gjitha dështimet që po i ndodhin LDK-së, shtresë kjo e cila plot gojën e ka reforma e demokraci dhe asgjë nuk bëjnë për demokracinë, veçmas pas vdekjes së Presidentit dr. Ibrahim Rugova, ku nuk kanë të bëjnë asgjë të përbashkët me demokracinë.

Mesazhi i autorit në këtë libër, nuk është qëllimi  që ti etiketojë:  politikanët, qeveritarët, gazetarët, por që t'i ndërgjegjësojë veprimet e tyre  antinjerëzore,  antiligjore dhe antikombëtare, e thelbi i gjithë kësaj është që të mos dominojë e keqja mbi të mirën, por të dominoj njerëzorja dhe kombëtarja. Pra ai sugjeron që në çdo instancë apo pore të jetës të dominojë vlera e jo anti vlera, dija dhe jo mosdija, drejtësia e jo padrejtësia, pra me një fjalë  respektimi i etikës njerëzore dhe ligjeve në fuqi.

Të gjitha këto autori i thotë me qëllimin më të mirë që t'u lëshohet vendi gjeneratave të reja të cilat duhet ta marrin në dorë udhëheqjen dhe ndërtimin e shtetit, gjenerata këto që jam i bindur se do të din ta ndërtojnë të ardhmen e vendit, të krijojnë ura miqësie me të gjitha shtetet e botës, e në veçanti me shtetet mike në krye me SHBA-të.

Këto çështje që i theksuam më lartë, janë në librin e autorit, gjëra këto të cilat nuk i ka shpikur autori, por të dëshmuara dhe të argumentuara me fakte konkrete, edhe pse për dikë e vërteta është shumë e dhembshme, ne duhet të mësohemi me kritikën e mirëfilltë, dhe ajo duhet të respektohet!...

St. Gallen, 18 dhjetor 2011.

Prof. Sallah Januzi

Fjala e Mr. Zef Ahmetit,

Me rastin e promovimit të librit "11 MINUTA PARA ORËS '00 ose mirazhi i suksest të LDK-së ", të Shefqet Dibranit.

PO KU ËSHTË LDK-JA SOT?

Sh. Dibrani: „11 MINUTA PARA ORËS `00 ose mirazhi i suksesit të LDK-së“, Prishtinë 2011.

Dibrani, jep një risi në skenën politike të Kosovës. Ai, kritikon partinë e vet pa u larguar nga ajo, një element krejt normal në demokracitë perëndimore!...

Shkruan: Zef AHMETI

Disa herë kam dëgjuar se Shefqet Dibrani është një „militant i LDK-së“.  Dhe shtrohet pyetja, pse ky emërtim? Nga Leximi që i kam bërë librit kam ardhur te përfundimi se ai ishte një simpatizant i pathyeshëm i LDK-së, respektivisht i frymës dhe vizionin politik të Ibrahim Rugovës.

Përmbajtja e librit të imponon, varësisht nga ajo se si  perceptohet, sa një ndjenjë krenarie të autorit, po aq edhe shqetësimet e tija për disa ngjarje dhe rrjedha që ndodhin në historinë e aktivitetit të LDK-së. Autori në asnjë çast nuk e konteston kontributin e jashtëzakonshëm të kësaj partie në historinë më të re të Kosovës.

Po ku është LDK-ja sot? Kjo është pyetja e parashtruar.

Dobësimin e këtij subjekti politik në skenën politike të Kosovës Shefqet Dibrani e sheh në rend të parë në tendencat e fraksionet e ndryshme përbrenda kësaj partie. Dibrani, duke qenë pjesë e ngjarjeve dhe anëtar i pathyeshëm i saj, paraqet versionin e tij, pse LDK-ja është ku është sot.

Përveç ngjarjeve të jashtme, që ndikuan në dobësimin dhe thyerjen e LDK-së, pas vdekjes së presidentit Ibrahim Rugova, ai fokusohet sidomos në gabimet dhe lëshimet që ndodhin përbrenda saj. Në politikat e gabuara, sipas autorit, të lidershipit të saj dhe tendencat jodemokratike për të marrë udhëheqjen e partisë. Ai i kërkon gabimet në vetvete, pra në LDK. Duke pasur parasysh demokracinë dhe lirinë e re në Kosovë, Dibrani jep një risi në skenën politike të Kosovës, duke kritikuar partinë e vet pa u larguar nga ajo, një element krejt normal në demokracitë perëndimore.

Autori është kritik edhe për disa ngjarje dhe ecuri sociale e politike në Kosovë që njëkohësisht reflektojnë qëndrimin e tij dhe dëshirën, se ku donë ta shoh atdheun e tij. Ai ka kuptuar se liria dhe demokracia janë dy koncepte të cilat kërkojnë përherë punë dhe përkushtim.

Ngjarjet që ai i trajton në libër jo vetëm se shprehin vlerësimet e tija, porse ato ai i fuqizon me referimet e shumta, ku na thotë se, nuk është i vetëm në atë që e shkruan në libër.

Dhe, nëse e kam kuptuar mirë librin, unë kam ardhur në përfundim se, ai donë të na thotë pra, para se t`i akuzojmë të tjerët për situatën ku jemi, ne duhet të jemi së pari vetëkritikë për veprimet tona. Çfarë kontribuuam vet për situatën ku jemi, është pyetja e tërthortë që ia parashtron Shefqet Dibrani partisë së tij.

Shefqetit i mungon fryma e politikës së Rugovës në LDK.

Unë shpresoj  që ky libër do të hapë një debat pozitiv që do t`i bënte mirë vetë LDK-së dhe shoqërisë kosovare.

Si përfundim dua të potencoj edhe njëherë atë që na thotë Dibrani në mënyrë indirekte, se para se t`i akuzojmë të tjerët për situatën ku jemi, jo vetëm si njeri, si parti,  a si shqiptar, t`ia shtrojmë vetvetes pyetjen, çka kam kontribuar unë vetë për gjendjen ku jam, përkatësisht për situatën ku jemi?

St. Gallen, 18 dhjetor 2011.