AKADEMI PËRKUJTIMORE PËR HEROIN E KOMBIT SALIH ÇEKAJ

Nën patronazhin e Shoqatës Humanitare « Salih Çekaj » në Menziken (CH), e me rastin e 12 vjetorit të rënies heroike, sot në Surse u mbajtë Akademi Përkujtimore për Heroin e Kombit Salih Çekaj.
Që në fillim ndiej për detyrë parësore të them se kjo Akademi, u dallua me një organizim shembullor që rrallë shifet këtyre viteve në mërgatën tonë "evropiane" dhe do të kisha dashur të jetë shembull për të gjitha manifestimet që mbahen në këto anë, pa marr parasyshë llojin dhe qëllimin e tyre. Salla bukur e rradhitur, dekori pa elemente snobe, pajisja teknike si dhe kamerat e vendosura në vende diskrete që nuk penguan asnjëherë syrin e publikut, e bënë akoma më mëdhështore këtë përkujtim dinjitoz.

Sa i përket rradhitjes së pikave, gjithashtu mbretëroi një rregull i përpiktë dhe i drejtuar me talent të rrallë. U fillua me Himnin Kombëtar për të vazhduar mëtej me hapjen zyrtare të tubimit nga ana e Z. Gjukaj dhe përshëndetjes se mysafirëve nga ana e Kryetarit të SH.H. S. Çekaj, Z. Saim Tahiraj. Në vijim, për veprën e Heroit foli publicisti Sefedin Krasniqi duke ia lënë pastaj fjalën së pari vëllaut të Dëshmorit, Z. Smail Cekaj dhe mandej vazhduan oratorët: Z. Haki Latifi, Z. Miftar Kryeziu, Z. Shefqet Baçaj, Znj.Dine Gashaj…

Pikat artistike të egzekutuara nga nxënës shqiptarë, nën drejtimin e mësueses Zonjës Shake Krasniqi në Shabley, joshën publikun me Recitalin e Heronjëve të Shqipërisë Etnike dhe me një poezi për heroin Çeku të thënë me shum emocione nga Edona Hoxha.

Vëllezërit Sami dhe Avni Alimusaj, kënduan këngët « Për liri të vatanit » dhe « Pse jam toskë e pse jam gegë ». Manifestimi u mbyll me dy këngë të bukura të kënduara nga ylli shqiptar, Adelina Ismaili.

Si që përmenda në fillim, organizimi i jashtëzakonshëm që më shtyri se pari të flas për rrjedhën dhe të lë në përfundim të artikullit, fjalën e hapjes së Akademisë së sotme nga Z. Gjukaj :

…

« Zonja dhe Zotërinjë,

Më lejoni që të shpallë të hapur këtë Akademi Përkujtimore për Heroin e Kombit të madhin Salih Çekaj , në 12 vjetorin e rënies së tij heroike në altarin e lirisë.

Me praninë tuaj këtu, në rradhë të parë ju nderoni veten tuaj, na bëni nderë neve si organizatorë të kësaj Akademie Përkujtimore dhe dëshmoni edhe njëherëse burrat e Mëdhenj të Kombit si Salih Çekaj, janë dhe do të mbesingjithëmonë të pavdekshëm, andaj më lejoni që në emër të SH.H. « Salih Çekaj » nga Menzinkeni, që është edhe organizatore e kësaj Akademie Përkujtimore, të ju peërshëndes dhe të ju falenderoj për pjesëmarrjen tuaj.

Të nderuar Zonja dhe Zotërinj, ne sot jemi tubuar të kujtojmë një kolos të madh të kombit Shqiptarë, një nga gurëthemelet më të forta të shtetit të Kosovës, njeriun që nuk u thye asnjëherë nga asnjë stuhi, sa do të forta të ishin ato, njeriun që në mendjen e tij gjithëmonë kishte të vetmin mendim, e ajo ishte LIRIA, çlirimin njëherë e përgjithëmonë nga pushtuesit sërbosllav, andaj ne që sot po e gëzojme lirinë për të cilën Dëshmori Salih Çekaj dhe shum dëshmorë të tjerë, dhanë më të shtrenjtën, jetën e tyre. Na mbetet që të duam njëri tjetrin, ta ndihmojmë njëri tjetrin, të kontribuojmë në forcimin e Shtetit të Kosovës, duke mos harruar asnjëherë të kaluarën tonë të hidhur, duke i kujtuar dhe nderuar me pietetin më të madh Dëshmorët e Lirisë. »

Sherife Reka

(Sipas raportimit të Z. RM)