Qysh atë ditë që i lamë vendlindjet –
Kurrë s’ pushuan vuajtjet , as dhimbjet !...

Qysh atë ditë që ua kthyem shpinën –
Verat tona na u banë dimër !

Kur ua mbyllëm shtëpive derën –
Kurrë për jetë s’e pamë pranverën !

Kur i lamë shtëpitë nën dry –
Kurrë s’ pushuan lotët nën sy !

Kur ua kthyem shpinën oborreve –
Si me u nisë në rrugë të varreve !

Morëm rrugët nëpër bërryla –
Kurrë për jetë s’ dëgjuam bylbyla !

Qysh se i lamë lisat me myshqe –
Kurrë për jetë s’ dëgjuam qyqe !

Qysh se i lamë vatrat e t’ parëve –
Kurrë nuk pamë lule t’ beharëve !

Qysh kur lamë molla e dardha –
Kurrë n’ këtë jetë nuk pamë ditë t’ bardha !

Qysh kur lamë kumbulla e qershia –
Kurrë nuk ditëm ç’ është hijeshia !

Qysh kur lamë pjeshka e ftoje –
Kurrë nuk pimë ma ujë në kroje !

Qysh kur lamë trojet pa burra –
Kurrë nuk pimë ma ujë ndër gurra !

Qysh kur lamë ara e livadhe –
Kurrë n’ këtë jetë s’ mbetëm pa halle !

Qysh kur lamë kopetë e bahçet –
Kurrë s’ na u terën lotët nga faqet !

Kur ia kthyem shpinën malit –
Kurrë s’ na u terën sytë prej mallit !

Kur ia kthyem shpinën magjes –
Kurrë s’u pamë me djemtë e axhës !

Kur ia kthyem shpinën vatrës –
Kurrë ma bashkë s’ jem ulë rreth sofrës !

Kur ia kthyem shpinën kapixhikut –
Kurrë s’ ia pamë ma fytyrën mikut !

Kur ia kthyem shpinën ograjës –
Kurrë s’ ia pamë ma fytyrën dajës !

Kur ia kthyem shpinën kodrës –
Kurrë nuk pamë ma burra t’ odës !

Kur ia kthyem shpinën lisit –
Hupëm lidhjet e farefisit !

Kur ia kthyem shpinën Malësisë –
Kurrë nuk ndiem këngë t’ çiftelisë !

Kur ua kthyem shpinën puseve –
Kurrë nuk pamë ma kerre t’ nuseve !

Kur ia kthyem shpinën Gollakut –
Kurrë nuk pamë krushqi t’ bajrakut !

Kur ia kthyem shpinën bukës , kripës –
I harruam shkronjat e shqipes !

Që kur erdhëm në qytet –
Nuk pamë kurrë ma bereqet !

Që kur ikëm në kurbet –
Vatrat tona mbetën shkret !

Kur ia kthyem shpinën Kosovës –
Kurrë s’ia pamë flatrat shqiponjës !

Sado kohë që do t’ kalojnë –
Vatrat tona do t’ na mallkojnë !

Gjilan, më 10.04.2014.