Jehona Sylejmani - fituesja  parë e konkursit letrar të Filoletit

Poezia « Ku jeni ?» u zgjodh e dyta në konkursin Filolet 2010 që është sukses i bukur kur dihet se autorja është shum e re e të drejtë pjesëmarrje kishin të gjithë ata gjer në moshën 27 vjeçare. Kjo na shtini të kontaktojmë autoren e re Jehona Sylejmani për një bisedë me të dhe me prindërit e saj. Familja pranoi me shum dëshirë dhe na filluam intervistën së pari me prindërit e Jehonës…

Filolet:

Zonja Sylejmani, jeni krenare me vajzën tuaj, na thoni ç’pritni nga ajo në të ardhmen. Keni ndonjë dëshirë për shembull për studimet e saj, doni t’i sygjeroni ndonjë lëmi ?

Zonja Sylejmani:

Natyrisht se jam krenare dhe çdo nënë do të ishte krenare me një vajzë të tillë ndërsa sa i përket studimeve ne do ta lëmë të lirë në zgjedhjen e saj.Ajo në intervista të mëhershme ka deklaruar se poezia do të mbetet hobi  gjatë gjithë kohës ndërsa planifikon që të bëhet ekonomiste, në këtë rast nese nuk ndërron mendje unë me shumë dëshirë do t'i propozoja që të studioj ekonominë islame pasiqë është në trend në nivel  botëror.

Filolet:

Zotëri Sylejmani, Ç’mendoni ju për këtë ?

Z. Sylejmani:

Me të vërtetë ne ishim shumë të befasuar kur kuptuam për shpërblimin pasiqë është fjala për konkurs mbarëkombtar. Megjithatë kjo nuk është befasia e vetme. Jehona poashtu në fund të vitit të kaluar ka konkuruar në një konkurs poezie në Maqedoni dhe është shpërblyer me vendin e parë. Të ju them të drejtën janë këto dy rastet e vetme kur Jehona merr pjesë në konkurse letrare edhe pse kaherë si te them "e ka mbushë kuotën"  për të botuar librin e saj të parë. Me lejoni të ju informoi se Jehona ka mbaruar nëntë vite shkolle dhe është regjistruar në Gjimnaz. Si  nxënëse e shkollës fillore "Xhemail Mustafa" në Prishtinë, pesë vite radhazi është shpërblyer me diplomë  nga Kuvendi Komunal i Prishtinës në garat komunale te diturisë. Gjithashtu ka qenë Kryeredaktore e Revistës së Shkollës dhe Kryetare e Rinisë së Shkollës. Ne presim që të vazhdojë me suksese si gjimnaziste dhe realisht nga ajo pritet  që të bëhet një kuadër e fortë si në vend mbase edhe jashtë Kosovës.

Filolet:

Jehona, i dëgjove prindërit, ti vet ke ndonji plan për studime apo do të ndërpresish më herret me shkollimin?

Jehona:

Çdo vajzë e vogël ëndërron të bëhet mësuese dhe një gjë të tillë e kam pasur edhe unë në mendje.Përderisa rritesha më sillej në kokë edhe gazetaria,mirëpo ja që kur mora timonin e jetës sime në duart e mija vendosa për ekonomi.Si sferë e jetës gjithnjë më ka interesuar dhe thjesht gjej veten aty.Shpresoj që këto plane do të më realizohen dhe do t’i marr parasysh edhe propozimet e prindërve.

Filolet:

Poezia e yte flet për tragjeditë shqiptare të Detin Jon ?

Jehona:

Sinqerisht jo. Unë poezinë ua kam kushtuar të zhdukurve gjatë luftës 1998-99 në Kosovë dhe burim i inspirimit tim ka qenë fakti se shumë familje edhe pas 11 vitesh që kanë kaluar nga lufta nuk mund të flenë ende të qetë. Deti në poezi përmendet vetëm në kuptim të figuratif. 

Filolet:

Tani kur bisedojmë për poezi, na thuaj  në çfar moshe fillove të krijosh vargjet e para ?

Jehona:

Me letërsi kam filluar të merrem në moshën 9 vjeçare dhe punimi im i parë letrar ka qenë proza ‘’Ekskursioni’’ që është çmuar shumë nga mësuesit. Ndërsa me poezi kam filluar të merrem më vonë.

Filolet:

Ke patur gjithashtu shum vota nga vizitorët e Filoletit, shpresojmë se shoqet dhe shokët e klasës sate kanë votuar për poezinë tënde ?

Jehona: 

Po sigurisht. Shfrytëzoj rastin t’i falënderoj gjithë ata që kanë votuar për poezinë time dhe gjithashtu i përshëndes shumë shokët dhe shoqet e klasës me të cilët jam ndarë që tre muaj dhe u uroj fat në shkollim të mëtutjeshëm.

Filolet:

Në Filolet mendojmë se ke dhunti të posaçme për poezi, dhe shpresojmë se profesorët e gjuhës të kushtojnë rëndësi që të mund sa më mirë të zhvillosh mundësitë dhe njohuritë letrare ?

Jehona:

Falënderoj Zotin që më dha këtë dhunti. Çdo njeri që synon sukses nuk mund ta arrijë pa përkrahje të madhe,prandaj falënderoj shumë mësuesen time të gjuhës e cila më dha shumë njohuri për letërsi dhe më dha kurajo që në hapat e parë. Pra nga ajo kam marrë një bazë të fortë për të vazhduar më tutje.

Filolet: 

Faqja e ynë merret me filozofi dhe letërsi, dy lëmi jo larg njëra tjetrës, shpresojmë se ti një ditë do të zgjërohesh edhe në filozofim ?

Jehona:

Nuk e kam menduar një gjë të tillë po pse jo ndoshta një ditë do t’i perkushtohem pak dhe filozofisë.

Filolet:

Kemi dëshirë vizitorëve të webfaqes sonë t’i prezentojmë edhe ndonjë poezi tënden ?  Nëse pajtohesh të na japësh një dorëshkrim për të pa publikuar  më parë? 

Jehona:

Kam nderin dhe si fituese e konkursit ndjehem e obliguar që vizitorëve tu ofroj që të njihen më shumë me poezitë e mia shpresoj  t’iu pëlqejnë.

Filolet:

Jehona, të dëshirojmë shum sukses në të ardhmen dhe përgatitu për konkursin e vitit të ardhshëm i cili do të jetë i hapur për të gjitha moshat !

Jehona: 

Faleminderit shumë juve për mundësinë që ma dhatë të depërtoj më shumë tek lexuesit e faqes suaj. Ishte kënaqësi intervista me ju. Shpresoj të paraqitem sërish me një poezi të tillë në konkursin e ardhshëm.

Filolet:

Familja Sylejmani, më lejoni  tani të ju prezentoj nderimet më të thella të ekipit të Filoletit dhe falemnderit  që pranuat intervistimin.

***

Vizitorë të nderuar, adhurues të poezisë dashamirë të fitueses Jehona Sylejmani, në vazhdim  publikojmë poezinë  të cilën me dashuri të posaçme për  të gjithë, na e dhuroi autorja ynë...

Lulet pranverore

(kushtuar fëmijëve të dëshmorëve)

Që ta shohin diellin

U doli një pengesë

Gjysmën e dritës së tyre

Që tua ndërpresë

Si hije e fuqishme

Pas mbetën

Si diçka e pathyeshme

Për tu krenuar me veten

Lulja e këputur

Ylli i rënë

S’kanë kurrë për tu zhdukur

Se pas diçkakanë lënë

Lulet praneverore

Ti ujisim na thanë

Sepse ne hyjmë tek ata

Për të cilët jetën dhanë

                                                                                   Jehona Sylejmani  

                                                                                                    8/3